خرجت
من المنزل صباحا ، كان الجو مشمسا فالصيف على الأبواب ، توجهت إلى مقهاي
المفضل لإحتساء كوب من القهوة (شي قهوة مهرسة) و في الطريق مررت بالقرب من
ثانوية (س.د) لمحت عددا كبيرا من السيارات قبالتها و الجو مشحون و لا أثر
لأي حركة خارجها ، دخلت المقهى المقابل تماما للثانوية و توجهت إلى مكاني
المعتاد (لاطيراس)، لم أطلب من الناذل شيئا فقد تعود على مواعيدي و حتى
على ما أطلبه و أصبحت من أهم الزبائن لديه منذ أن انقطعت من الدراسة ،
كثيرا ما كنا نجلس لنتبادل أطراف الحديث كل صباح و الزبناء قليلون ،قدم
ابراهيم (الناذل) لي كوبا صغيرا من القهوة و كأسا من الماء و أخدت أحتسي
ببطئ إلى أن جاء قبالتي ،
- مجيتيش البارح ؟؟
- لا مشيت نشوف داك خينا واش فيه شي معنى
- و عطاك رزقك ؟؟
- والو أصاحبي قال لي حتال اللخر د السيمانة
- آه إيوة شنق عليه متزكّلوش أخاي السيمو ،
- ضروري منتعاتقش معاه
آه ، عرفتي زمتوهم البارح فالفيزيك حتى واحد مقشبل شي حاجة
- شكون ؟؟
- صحاب الباك أصاحبي
- علاه كيدوزوا دابا ؟؟
- وايلي أصاحبي مالك دايخ ، اليوم الثاني
- آه ، و مفراسي ميتعاود ، من نهار خطيت داك الزعت مبقيت كنتسوق ليشي حاجة ههه
- قتلوني واحد الجوج جايين معطلين مخلاوهمش يدخلوا ههه
إبراهيم
حاصل على الإجازة في القانون الخاص و لكن القدر قاده ليكون ناذلا مثله مثل
آلاف الشباب العاطل الذي يكره هذه البلاد السعيدة ، و كان دائما ما يقول
لي (الله يجيب لهاد البلاد شي زلزال يزكّيها مع سبانيا ههه) ، بلد
المتناقضات ، الحاصل على الإجازة أو الدوكتوراه فيها يتخرج عاطلا ، و
(الشفار) وزير خخخخ ، الله يعفوا علينا و صافي ..
ذهب
ابراهيم لعمله و بقيت مع قهوتي التي أصبحت باردة مع الوقت ، استعدت شريط
الذكريات عندما كنت مقبلا على امتحان الباكالوريا يومها كل الكل متوثرا و
مشحونا و عصبيا إلاي (مكنتش مسوق) استعرضت كيف مررت من جميع المواد و أنا
لم أكتب حرفا في أوراق تحريرها اللهم الإسم الكامل و الرقم التسلسلي .. و
أنا في غمرة ذكراتي إذا بالبوابة الكبيرة للمؤسسة تفتح و تغلق و يخرج منها
طيف فتاة قطعت الشارع في حنو و هي تحمل حقيبة يدوية بيد و أوراقا في اليد
الأخرى ، اقتربت من المقهى و ارتقت السلم و توجهت نحوي في صمت ، وقفت
أمامي تتطلع إلى داخل المقهوى دون أن تعيرني كبير اهتمام ، بدأت بالنظر
تعتريني بسمة عابرة ، بدارتها بالحديث :
- ياكما باغة تشربي ؟؟
- آه الله يخليك أخويا
قدمت لها كوب الماء خاصتي و تناولته ثم شكرتني و همت بالرحيل ، لكنني بادرتها مرة أخرى في جرأة كبيرة هذه المرة ..
- كي دوزتي بعدا مزيان ؟؟
- شوية و صافي ، اتفلسفنا شوية و متعرف آش يحطوا لك هاد القوم
- إيوة يدير الله خير ، بركي بعدا تستارحي عاد سيري
- لا شكرا خاصني نمشي دابا ،
- مزال الحال حتى نتي تسناي حتى تخرج شي درية تعرفيها و جري معاها طريق متمشيش بوحدك
- نتسنا شوية صافي راه خاصني نراجع العشية
- واخا ماشي مشكل
تناولت
الفتاة الكرسي في هدوء و جلست قبالتي واضعة حقيبتها السوداء على ركبتيها ،
فاردة دراعيها إلى الأمام كانت عيناها زرقاوتين و خدود حمر و سعر أسود
مفرود على كتفيها كأنه ستارة فاخرة ، نسيت نفسي و أنا أتطلع إليها بدون أن
أنبس ببنت شفة إلى أن بادرتني هي بالقول و هي تشير إلى بأصابعها :
- إيييييييييه الدري مالك كتفرج فالحلقة الأخيرة ؟؟
- لا أختي يالله الحلقة الأولى هادي ، مزال المسلسل طويل هههه
- إيوة الله يحفظنا من الحلقات الجاية هههه
- أجي كاع مقلتي لي شنو تشربي ؟؟
- لا لا شكرا والله مباغة والو ..
- لا لا مستحيل ، أول مرة تهبط القمرة عندنا من السما و متشربش معانا شي حاجة ! جات حشومة
- هههه لا والله راني شربت الما ، مرة خرى إن شاء الله
- (القضية فيها مرة خرى !! بيخير هههه) واخا أختي لي بان لك
(بغيتي واحد رايب بالسيرو كيما قال خويا رضى و واحد طرف د الكيكة كيما قال الفيلسوف، مرحبا ههه)
- شكرا بزاف ..
- أجي دابا أنا غادي نبقا نكول لك ختي و نتي تبقاي تقولي لي خويا ؟؟ قولي لي شنو سميتك
- ههههه علاه مالها خويا ، أنا سميتي ابتسام و نتا ؟؟
- أنا سميتي السيمو ، غدا آش عندك فالإمتحان ؟؟
- عندي السيونس صافي ..
- إيوة بالتوفيق ، تنجحي تولي شي أستاذة ولا شي معلمة غزالة
- ها العار غا نجيبوه أخويا ، 12 عام هادي و حنا مضاربين على وده ..
- أنا نخاف عليك من الحراسة أختي والله ..
- علاش !!!!
-
إيوة درية غزالة بحالك و عندها عوينات زرق بحال هادوا ، أي أستاد يجي يحرس
غادي يبقا مقابلك غا نتي ، غادي تديري المزيان مع القسم ولكن غادي تتصيدي
نتي بالبيان ههههه
- هههه حشومة عليك تطنز علي ههه
- لا لا حاشة نطنز عليك غا كنبسط معاك و صافي ..
- هههه ها واحد صاحبتي خارجة دابا نمشي معاها نشوف نراجع شي حاجة للعشية
- صافي سخيتي بي دغية ، ولا مرضتك بكثرة الشفاوي ياك هههه
- لا لا أخويا بالعكس الوقت داز معاك بزربة
- بدينا فالصباغة عاود ثاني ههه ياللا دابا الواحد إلى باغي يشوفك مرة خرى فين يلقاك ؟؟
- سير لـ google هههه
- لا لا لي بحالك مكيكونوش فالأنترنت ، لي خيبوعة هي لي كتعمر تم حيت ملاقياش فالشارع لي يقدرها ، و نتي يتخاطفوك السيطان بالخف هههه
- هادي هي الصباغة د بالصح ههههه حتى أنا راه كنمشي للأنترنت بزاف
- و دابا بلا متخلي صاحبتك تتسنا بزاف ، قولي لي واش نتشاوفوا مرة خرى ولا لا ؟
- خليها للصدف شكون عرف آش مخبي الأيام
- الصداف ديال القميجة ولا ديال الكومبلي ههههه و تدوي معايا نيشان ، مفيها باس إلى قلتي لي لا مباغاش ، هانية
- مهم غدا غادي ندوز السيونس و نشوفك ملي نخرج هنا نيت أوكي ؟؟
- آه واخا ، بالحق تخلصي علي منشربوا هههه أنا عرضت عليك اليوم مبغيتيش ، غدا العراضة على حسابك هههه
- و مسخوط مع راسك هههه ياللا أنا نتزلع فحالي ، تهلا لي فراسك
- واخا الزوينة تهلاي لي فروحك ، نتقاشعوا غدا
وضعت
يدي على خدي متكأ على المائدة و أنا أنظر إلى الفتاة و هي تنصرف في هدوء
إلى صديقتها الواقفة قبالة بوابة المؤسسة و من تم تختفي في خضم أمواج
الطلاب الخارجين من الإمتحان ..
تقدم
ابراهيم و جلس بالقرب مني و ابتسامة مكر تعلوا محياه ، اتكأ على المائدة و
وضع كفه على خده و فتح عينيه نصف فتحة و أخد يرمقني بنظرات ساخرة ..
- آش كتشوف أصاحبي هههه
- حيت عجبتيني و هبلتيني و شيبتيني حبيتك و عشقتك و سهرت الليالي كنفكر فيك هههه
- ههههههه
- تمالك الزابور تع لي خلفوك مع بنات الناس حتى وحدة معطيتيها التيساع ، مداير بحال الفاكتور من هادي لهادي
- إيوة شغادي تدير راه كنلعب دور هام فالمجتمع هههه
- حشمت نقول لك آش كتلعب هههه أودي سير ضبر لك على شي خدمة الصعلوك و نتا لا قراية لا خدمة ههههه
-
كيتك نتا عندك إجازة و خدام لي سرباي ههههههه على الأقل أنا شابع راحة و
شاد الصرف ، نتا بزز باش كتشد ديك 80 ألف فرنك فالشهر أنا هداك الثنت
كنشده غا فسيمانة ههههههه
- سير يا ولد اميمته سير تعطيك السكاتة ههههه الله يعطينا وجهك هههه
- ههههه
- شكون بحالك المسخوط طايح على تيتيزة واعرة ، شنو سميتها بعدا
- والله معقلت واش قالت لي سلوى ولا سلمى ولا شي حاجة بحالما هكا ، المهم القضية فيها السين هههه
- جات معاك أخويا ههههه حنا معندنا زهر مع بنات حواء ، و مشديتيش ليها شي حاجة تشربها ؟؟ وليني قرزاز مع راسك
- لا قلت لها طلبي لي بغيتي قالت لي لا هههه
- إييييه أسيدي
- إيوة شغادي تدير ، ياللا أنا غادي نتلاح ، نتشاوفوا غدا إلى جيت
- أجي فين غادي ، خلص القهوة هههه
- مهازش معايا دابا والو والله ههههه
- و باغي تعرض على بنات الناس هههه سير أخويا الله يورينا وجهك فشي كارطونة ديال بومبيرس
- هاديك كتسما التسنطيح بالعربية هههه
- واخا اسيدي منكم نتعلم ، را غادي نخلصها من جيبي غدا جيب لي رزقي الشفار
- واخا تلاح أبيه
السبت يونيو 07, 2008 6:52 pm